Thursday, 28 August 2008

ഏകാന്തം

ഋതുക്കൾക്കൊടുവിൽ
ക്ഷണിക്കാതെ വന്നെത്തിയ ശിശിരം
തിരികേ പോകാൻ മറന്നു പോയിരുന്നു

പൊഴിഞ്ഞു വീണ് മണ്ണടിഞ്ഞ ഇലകൾ
പിന്നീടെപ്പോഴോ ചിറകുകളാർന്ന്
ചെറുശലഭങ്ങളായി പറന്നുയരുകയായിരുന്നു

പുകമഞ്ഞിൽ വഴിതെറ്റിപ്പോയതിനാലാകുമോ
അവ തിരികേ വരാതിരുന്നത്?!!

ഇന്ന്
കനത്ത മൂടൽമഞ്ഞൊഴിച്ചാൽ
ശലഭങ്ങൾ മറഞ്ഞ ആകാശവും
തിരിച്ചു വരുന്ന
ഏതോ കാലടികളെ പ്രതീക്ഷിക്കുന്ന
ഭൂമിയും
തികച്ചും ശൂന്യമാണ്