Friday, 10 October 2008

സ്വപ്നങ്ങൾ

സ്വപ്നങ്ങൾ; ഒരു നിദ്ര തന്നായുസ്സിൽ
വിടർന്നു പൊലിയുന്ന വർണ്ണക്കുമിളകൾ
ഉണരുന്ന മനസ്സിന്റെയടച്ച കിളിക്കൂട്ടിൽ
ബന്ധിതരാകുന്ന പഞ്ചവർണ്ണക്കിളികൾ
ഉറങ്ങുമ്പോൾ, മനസ്സിന്റെ ബന്ധനമഴിയുമ്പോൾ
അന്തരാത്മാവിൽ നിന്നവ പറന്നുയരുന്നു
വർണ്ണച്ചിറകുകൾ നീളേ വിരിച്ചിട്ടു
ആവോളം നശ്വരവാനിൽ പറക്കുന്നു
സ്നേഹത്തിൻ മധുവൂറും പൂക്കളാൽ നിറയുന്ന
മായീകമൊരു പൂവാടിയിൽ ചെല്ലുന്നു
ആത്മാവിൻ ദാഹങ്ങളാകുമാ പൈങ്കിളികൾ
ആ പൂക്കളിലെ തേനൂറ്റിക്കുടിക്കുന്നു
നിദ്ര പൊലിയുമ്പോൾ, മനം വീണ്ടുമുണരുമ്പോൾ
ഉണ്മയാം കൊടുംതാപം ചുറ്റുമെരിയുമ്പോൾ
സ്വപ്നത്തിൻ പഞ്ചവർണ്ണത്തൂവലുള്ളൊരാ
പക്ഷികൾ മനസ്സിൽ ചത്തു മലക്കുന്നു
കരിഞ്ഞൊരാ തൂവലിന്നോർമ്മയായ് കൺകോണിൽ
ഒരു ചെറുനീർത്തുള്ളി മാത്രം തിളങ്ങുന്നു

സ്വപ്നങ്ങൾ; അലയടങ്ങിയുറങ്ങും മനസ്സിന്റെ
നീർപ്പരപ്പിൽ വിരിയും വെറും ജലക്കുമിളകൾ
മാരിവില്ലിന്നേഴു വർണ്ണത്താലൊരു ചിത്ര-
ജാലം വിരിയിക്കും മായികക്കാഴ്ചകൾ
കൈവരാൻ കൊതിച്ചിടുമൊരു പ്രിയ ലോകത്തെ-
യാകെ പ്രതിബിംബിക്കും കുഞ്ഞുനീർപ്പോളകൾ
നിദ്രവിട്ടുണരുമ്പോൾ, മനസ്സിന്റെ നീരാഴി
അലയാർന്നു വീണ്ടുമീ ലോകത്തെ കാണുമ്പോൾ
ആ വർണ്ണക്കുമിളകൾ പൊട്ടി നശിക്കുന്നു
ഒരു ബാഷ്പബിന്ദു കവിൾ തൊട്ടു നനക്കുന്നു

സ്വപ്നങ്ങൾ; തകരുന്ന വെറും ജലക്കുമിളകൾ
അൽ‌പ്പായുസ്സാകുന്ന പഞ്ചവർണ്ണക്കിളികൾ
ഉണരുന്ന കൺകളിൽ പൊലിയുന്ന ദീപങ്ങൾ
അന്തരാത്മാവിന്റെ വിഫലമാം വാഞ്‌ഛകൾ