Sunday, 11 January 2009

കുശലം മറന്ന്....

നെടുവീർപ്പുകളെ ശുഭ്രമുടുപ്പിച്ച്
സ്വപ്നങ്ങളുരുക്കി വിളക്കിയ
ജപമാലയേന്തി
നിർവ്വികാരതയുടെ മണവാട്ടിയായി
നിന്നെ കണ്ട അവിചാരിതക്കും

കലാലയപ്പടവുകളിലും
മരച്ചുവടുകളിലും
നിന്നെ കാത്തു നിന്ന കണ്ണുകളെ കുറിച്ച്
അടക്കം പറഞ്ഞ
നിന്റെ
നിറമുള്ള വിചാരങ്ങൾക്കുമിടയിൽ
കാലം
ഏതാനും ജപമന്ത്രങ്ങൾ
ഉരുക്കഴിച്ചിരുന്നു

അൾത്താരയിൽ മുട്ടുകുത്തുമ്പോൾ
നിന്റെ സ്വർഗ്ഗോർദ്ധ്വനേത്രങ്ങളിൽ
ഇപ്പോൾ
വിളറിപ്രതിബിംബിക്കുന്നത്
മുൾക്കിരീടവും മരക്കുരിശും പേറുന്ന
രക്തം കിനിയുന്ന ആണിപ്പഴുതുകളുള്ള
ഒരത്താഴപ്പട്ടിണിക്കാരന്റെ
പഴകിക്കീറിയ കണക്കുപുസ്തകത്താളുകളിലെ
ഈറനുണങ്ങാത്ത
കണ്ണീർപ്പാടുകളുടെ
തിരുശേഷിപ്പ്