പേരു മറന്നവൾ.
ഊരു വിലക്കിയവൾ.
വാക്കു രാകി മൂർച്ച കൂട്ടിയവരാൽ
ഹൃദയം തേഞ്ഞുതീർന്നവൾ..
മൗനം ധരിച്ച്, നഗ്നയാക്കപ്പെട്ടവൾ.
എന്നോ തറച്ച മുള്ളിനാൽ
എന്നും മുറിപ്പെട്ടും,
കൺചില്ലു പാകിയ വഴികളിൽ
രക്തംചിന്തി നടന്നും,
മിഴി മൂടിയ നീതിവിരലിന്മുന്നിൽ
പലവട്ടം വേഴ്ചപ്പെട്ടും
നിൽക്കുന്നവൾ നീ – ഇര.
മിഴിക്കല്ലെറിയുന്നവർ
ചുണ്ടുകളിലൊളിപ്പിക്കുന്നുണ്ട്,
അന്ന് ഉമിനീരിനൊപ്പം
അവർ വിഴുങ്ങിയ നിൻ്റെ പേർ.
ഊരിയെറിയെപ്പെട്ട ചേലയ്ക്കൊപ്പം
തുണ്ടുകളാക്കി, കാറ്റിൽ പറത്തപ്പെട്ട
നിൻ്റെയിടം.
കീറിമുറിച്ചുള്ള പ്രേതവിചാരണയിൽ, പക്ഷെ
അവർ കണ്ടെടുത്തതേയില്ല,
നീ തിരയുന്ന സ്വത്വം.
xxxxxxxxxxxxxxxxxxxxxxxxx
