ഒറ്റ കൽച്ചീളാൽ ആഴമളന്നപ്പോൾ
തടാകക്കരയിൽ നിന്ന്
ഞാൻ
ആദ്യമായൊരു
കടൽ കണ്ടു.
എത്ര നല്ല മുങ്ങൽവിദഗ്ധണാണു നീ.
എന്നിട്ടും
അളന്നുതീരാത്ത
ഏതൊരാഴത്തിലേക്കാണ്
നീയതെറിഞ്ഞുകളഞ്ഞത്.
പിടിച്ചെടുക്കാനാവാത്ത വിധം
ആ കൽച്ചീൾ
ആഴങ്ങളെ മുറിച്ചുമുറിച്ച്
നിനക്കു മുന്നേ പായുന്നു.
വീണ്ടെടുത്ത് തിരിച്ചുനീന്തിയണയാനാകാതെ
നീയും
അപ്രത്യക്ഷത്തിലും പ്രത്യക്ഷമായ
ആഴങ്ങളെ അറിഞ്ഞറിഞ്ഞ് ഞാനും!!
നമുക്കിടയിൽ ആർത്തിരമ്പുന്നു, ദൂരങ്ങൾ..
