അഗ്നിപർവ്വതങ്ങൾ പൂക്കുന്നയിടങ്ങൾ
കണ്ടിട്ടുണ്ടോ?
അകക്കാമ്പു തിങ്ങിനിറയുമ്പൊഴും
ഉൾത്തിളപ്പിൻ്റെയൊരു
ചെറുപൂമ്പൊടിയും കാറ്റിൽ കലർത്താതെ
കൃതകൃത്യരായ് ഋതുക്കളെയേറ്റ്,
മരതകച്ചേല ചുറ്റി,
ഉർവ്വരഭൂമിപ്പട്ടവും ചാർത്തി
നിൽക്കുന്നുണ്ട്
ചിലവയവിടെ.
ഉള്ളിൽ
ഉരഞ്ഞുപെരുകുന്ന
ഉഷ്ണശിലാമുകുളങ്ങൾ
ശാഖകൾ തോറും
ലാവപ്പൂക്കളായ് വിടർത്തി
ഉൾക്കനം കുറയ്ക്കുന്നു, മറ്റുചിലവ.
എത്രമേൽ അമർത്തിയൊതുക്കിയിട്ടും
വിരിയാൻ വെമ്പുന്ന
അന്തർഘർഷണങ്ങളുടെ
പൂമൊട്ടുകൾ പെരുകിപ്പെരുകി,
പെട്ടെന്നൊരു നാൾ
സ്വന്തം വേരുകളിൽ വരെ
അഗ്നിപ്പൂക്കളെ വിരിയിച്ച്,
അടിമുടി പൂത്തൊരു
തീമരമായ്,
ഇനിയൊരു പൂക്കാലത്തിനായ്
ഒരു പൂവുമവശേഷിപ്പിക്കാതെ
ഒടുവിലത്തെ വസന്തവിരുന്നൊരുക്കുന്നു,
ഇനിയും ചിലവ.
No comments:
Post a Comment