Thursday, 11 February 2021

ചില അഗ്നിപർവ്വതങ്ങൾ

 അഗ്നിപർവ്വതങ്ങളെക്കുറിച്ചുള്ള നിർവചനങ്ങൾ

പലതാണ്

പ്രശാന്തതയോടെ കാണപ്പെടുന്ന
ചില ഭൂവിഭാങ്ങളുടെ
അഗാധതകളിലൊളിപ്പിക്കുന്ന
ചിലവയുണ്ട്
ഉള്ള് പൊള്ളിയുരുകുമ്പോഴും
അവ പുറമെ
ഒരു തണുത്ത ഭൂമികയെ
സൂക്ഷിച്ചിട്ടുണ്ടാകും
താളം തെറ്റിക്കാതെ
ഋതുക്കളെ
കൃത്യതയോടെ
വരവേൽക്കുന്നുണ്ടാകും
അകക്കാമ്പിലെ തിളപ്പിന്റെ
ഒരു തീപ്പൊരി പോലും തുളുമ്പാതെ,
ഫലഭൂയിഷ്ടഭൂമി എന്ന വിളിപ്പേരോടെ
തണുത്തുറഞ്ഞു പോയിട്ടുമുണ്ടാകും

എന്നാൽ
എല്ലാ അഗ്നിപർവ്വതങ്ങളും
അത് പോലല്ല

ഉള്ളിലേക്കൊതുക്കുന്ന
അഗ്നിശിലാ ശകലങ്ങൾ
തമ്മിലുരഞ്ഞ്
താപമർദ്ദങ്ങൾ വർധിച്ച്
ചിലവ
കത്തിയുരുകുന്ന ലാവയെ
പുറത്തേക്ക് വമിപ്പിക്കും
കൂടെക്കൂടെയുള്ള പൊട്ടിത്തെറികളിൽ
പല ശാഖകളിലൂടെ
ഉൾഘനം കുറയ്ക്കും

മറ്റു ചിലവയാകട്ടെ
ബഹിർഗ്ഗമാനമാർഗ്ഗങ്ങൾ കാണാതെ,
അമർത്തിയൊതുക്കും തോറും
പരസ്പരം കലഹിക്കുന്ന
അന്തർഘർഷണങ്ങൾ
പെരുകിപ്പെരുകി
ഒരു നാൾ
ഒരു മഹാസ്ഫോടനത്തിൽ
സ്വന്തം ഭൂമികയിലെ
ആഴത്തിലോടിയ വേരുകൾ വരെ
കത്തിയെരിച്ച്
ഊഷരമാക്കിക്കളയും
ഇനി ഒരു ഹരിതകാലത്തിന്റെ
വിദൂരസാധ്യത പോലും
ശേഷിപ്പിക്കാത്ത വിധം
സർവ്വം ഹനിച്ച്‌ കളയും
ചില [പെൺ] ജീവിതങ്ങൾ പോലെ

No comments: